سرى الليّل كلّه والمصلّي نصى الجامع
صدوقٍ من الرعّاد والبارق اللامع
صفا نقع  شهلوله على مشرعه قامع
قريباً من الحدّاث  عسرٍ على الطامع
جديدٍ زهر نبته  على مشرعه  شامع
يدير الهوى فكري على مخلف الرامع
اصوّر  بنون العين من طبلة السامع

وانا اخيل نوّن نازحاتٍ مرابيعه
ينثّر دقاق الما على يابس القيعه
عسيرٍ  على الورّاد صافي قراطيعه
ربيعه ورى حدٍّ  تعسّر مطاليعه
تداخل نباته  ماتعشّا جرابيعه
تصافا خفى روحي وجوهر مواضيعه
معامل خبير الروس واسرار تصنيعه

الا ياملّ قلبٍ كلّ مايقبل سواد الليل
الا ياتل قلبي ياجزا تلّت قلوص الريل
وجودي وجد من شدّوه في حدّ العراق وشيل
بعد ما ارهى على المطلاع شافه راعي الدربيل
على اللي مع جماله زاهي خده دقوق النيل

يجيه من العنى يامسندي مايشغل البالي
لياحركبه المقدم يجي تاليه مكتالي
تعاميمه بكل حدود يطلب دم رجالي
ولحقته جموس فوقها رشاش وعيالي
انا لو ماعرفته كان مالحق القصى حالي

فاضت الدمعه وحارنّ القوافي
عن جميل البوح فوح الصدر كافي
يابدر(1) جوفي عليه الحزن ضافي
يابدر مومن وبالحق أعترافي
مير بعض الناس لو ماتوا عوافي
الخساره مثل أبو غازي سنافي
الرفيق اللّي مع الأيام صافي
يوم قالوا مات عضّيت الأشافي
ليت راع الطيب سالم ومتعافي
لو مدى الدنيا تفرق واختلافي
يالله اللّي عالم ماعنك خافي
الوفا منك أنت مابالخلق وافي

كلّ مطلاعٍ تعذرني مشدّه
لابغيت أبديه عبراتي تردّه
من مفارق طيبٍ قلبي يودّه
المقدر لا نزل محدٍ يردّه
حزن أهل بيته وبكوتهم تسدّه
نادرٍ بالمرجله كلٍّ يعده
لازيٍ مارفقته لمعات جدّه
ضاق في وجهي فسيح المجرهدّه
زايده ربي من الأيام مدّه
كل مافيها يجي قافيه ضدّه
من عطى رحمتك وأحسانك تمدّه
لو وفا عبدك على قدره وقدّه

ملوك شعوب احاسيسي بميقاف اتحاد الدين
تتالتها عواصف ريح عابرةٍ بحور الصين
رهج قوّة غضب حتى تهادى من عواطف لين
تناجيني بسحر انغام لنسابت على التلحين
تساقى باتصاله جوهرٍ كنه ذهب عشرين
على طاقه سماويّه وزنها عالم التكوين
هو اللّي في عصا موسى فرق عنه البحر قسمين
صحيح انّ الفنون جنون رمز الشكّ للصاحين
قضت حجّتك ياحجاج في مكّه بلادك وين حديثك زين بسّ انّك تصلّي ماتقول آمين
على شاطي خليج عمان حرّك مركب البحرين
ابا أعلّمك ياللّي تازن المعنى على وجهين

رهجني من هلل جالٍ بعد هزّات زلزالي
على سطح البحر ترسم سلاسل ثلج وجبالي
بصرخة مستغيث دارها والهامي أوحالي
كما ينساب من شهد العسل جاري ليا سالي
عليه برونقٍ منسوج في تشكيل سلسالي
لها بأمره وتدبيره مطاليعٍ ومنزالي
نجا من راد له منجا وطبّقها على التالي
دليل العرف للعارف حقيقة روح الامثالي
ترىالحجّاج لاطّاف الوداع من الحرم شالي
على النّيات يجزي الله مخاليقه بالاعمالي
عبر مدخال هرمز في طريقه و البحر عالي
موازيني لها تسعه وتسعين اسم حلاّلي

ملّ قلبٍ فيه هاجوس يضيمه
دايمٍ والكبد تشكي من جحيمه
يافلاح أرجوك وافق للعزيمه
مشتهين إكرام هالنّفس الكريمه
كان به ولفٍ عسى ربيّ يديمه
شفّ بالي هرجة الناس القديمه
الرجال اللي نبي صارت عديمه
والمجالس شفت باتلاها هزيمه
لاحضرت الجمع في خطوا الوليمه
لجّةٍ تدوخك وأكثرها نميمه
قلت هذا عيب يامال الغنيمه
راحوا اللي كلّهم شيمه وقيمه
آه ياوقت مضى ما أحلى نعيمه

لا أستراح اليوم بكره ما أستراحي
ماتبردها نشانيش القراحي
العشاء عندي ووافق يافلاحي
وأن تعشت مانلزّم بالمراحي
أنحر اللّي جالسٍ يتناك صاحي
هرجة اللي عارضه بالشيب لاحي
كيف أجمّعها شتاتٍ بالنواحي
مقفيه وأسمع بتاليها صياحي
جازلك خمسه وباقيهم ضحاحي
ماحصل فيها وناسه وأنشراحي
قالوا أنهّ عندنا شيئٍ مباحي
وجنّب المقهور عن درب الطياحي
يوم نشته نوش خلاّني وراحي

ياورع جاب اقصاك ضاف الدليقي
هات العلوم وخاطرك لا يضيقي
لاتسمع اللّي هرجهم مايليقي
هروجهم ماهي بقفلٍ غليقي
انا ان كان انّك جهلت بطريقي
ليتك بصندوق الضماير تويقي
صبر وحيا وادراك عرفٍ غميقي
مواقفي ترفع نواظر صديقي
تلقى الوفى الصّافي جديد وعتيقي
ماني بمن يمشي بعقل الغريقي
واليا بلش  في  لقو ةٍ  مايطيقي

يوم انّك اطّلبت المسّير بمسيار
ممّا يقولونه ضعيفين الافكار
نقّالة النمّه قصيرين الاشبار
لوانّها قفلٍ فتحته بمسمار
تبا تعلّمك الليالي بالاخبار
وتشوف ماسجّل بلوحات الاسرار
ورجلٍ مدارجها رفيعات وعسار
لها مع النّاس الوفيين تذكار
وقفات طيبٍ مااشتريها بلاشوار
خبلٍ علومه مستحيلات وكبار
حقّه من القدره تصفصيف الاعذار

يوم دوّجت أمس بسدير والنّفس اسمحت
نظرة العاشق لمعشوقته يوم الفحت
بالسّويك النار والسلف والصّافي بحت
لاسحبت القير واهتزّ فزّت وانزحت
واندفعت موّرد النار بالدّو وّاسبحت
الطريق ليا ارتكاله نحرها وادبحت
كنّه اللي شاف من حومته طلعه تحت
من سدير بعصرها للصّداوي روّحت
من هلا مع دخلة الباب حسّاتي محت
قال علمك قلت ولدت حويه ولقحت
حرب سوة خطةٍ ماتسوى ونجحت
علمنا كد جا حروب المدينه وفرحت
كد صدر حكم الشريعه قصاص وصرّحت

التفتّ بنظرة الشّوق للبنز الصغير
لاقله حلو الزميّم على الوجه النوير
يرتهج وارد بواجيه ونداق الذخير
فزّة اللي صدّق الخشم عن شوف النظير
من ثمانية البساتم على الشاصي القصير
قام يرعد مقدم الشبك من صفق العبير
انحذف مع ضفّة الريش له قدام طير
ماقفلت سويكها الا على باب الامير
من غلا شيخٍ ليا جيت هلاّ من ضمير
شيٍّ ماعمري سمعته ولا ظني يصير
يم عرعر مشتكي بالحفر هدام بير
وجيت أبا نقض القضيه لبوك مع الظفير
قال ماينذبح بدال العراقي من مطير