حمر العقارب
قصيده في الشيخ متعب بن فيصل بن سقيّان,,,,
|
دنّولي اللّي للّوازم يقرّب
ليا ارتفع ضغطه بزيته تشرّب
يفزّ مثل اللّي عليه المهرّب
كنّه اليا خمّ الطريق و تكرّب
سبّاح دوٍّ دونه القيظ سرّب
عليه منيوبٍ من الشرق غرّب
دربه يدلّه واتّكاله على الرّب
ينشد عن البيت القديم المعرّب
للضّيف من تأسيس فيصل مجرّب
بيت الكرام اللّي صغيره يدرّب
متعبّ ولد عطّاف حدّ المذرّب
له عزوةٍ تعرف ولا تنتقرّب
عنها النشّاما بالملاقا تهرّب
أبي من الفعل القديم المجرّب
|
|
أدهم حدب له نازح الدّار قارب
واقعد على الطبلون حمر العقارب
ممشاه فرق و في مقامه يقارب
مع ضيّق المجرى حصيل المسارب
روس الروابي فيه مثل القوارب
حاديه هاجوسٍ هواه امتضارب
امليح(1) ميراده عذيّ المشارب
ماينتخفّى بيّنٍ بين اقارب
تنصاه بالشّده طوال الشوارب
يطلع خلفها من سلفها مقارب
بالكون من يمناً تجيد المضارب
تذكر وينسى غيرها بالمكارب
يعطون من عقب الوجيه الغوارب
وقفة غضب ماهيب لاهل التجارب
|
(1) مليح: بلدة ابن سقيان في طويق بين الغاط والزلفي.